لأننا شعب ساخر "ابن نكتة" نواجه مشاكلنا ومتاعبنا دائما بالسخرية منها.. لذا نسعى لتحويل المواقف السوداوية في حياتنا إلى عالم سمسم.. عالم ملىء بالضحك والسخرية والاستهزاء من المواقف السلبية التي نمر بها.. ربما للترفيه عن أنفسنا وربما للضحك على أنفسنا أكثر "لأننا لا نمتلك الحلول المنطقية لبحث سبب المشكلة وكيفية مواجهتها فنلجأ للهروب منها عن طريق النكتة والسخرية والضحك "
وأيا كان السبب فقد استطعنا أن نحقق الرقم القياسى في سرد المواقف المضحكة والطريفة حتى في عز الطلاق أو فسخ الخطوبة وربما فشكلة ارتباط حب "بقاله سنين".
سؤال ساخر
سأل أدمن إحدى الصفحات الاجتماعية على الفيس بوك " Society problems " سؤال ساخر طلب فيه من المشتركين سرد أطرف مواقف الطلاق وفسخ الخطوبة وفشكلة الارتباط " والغريب أن التفاعل كان كبيرا جدا ومن أكثر مواقف الحزن تظهر الكوميديا التي لا تستطيع أن تذكرها جميعا.
ونقتبس في السطور التالية طرفا مما كتبه بعض المشاركين، حاولنا تركه قدر المستطاع بطريقة المشاركين فربما كان ذلك أوقع في فهم المشكلات المطروحة ومداها.
فشكلة الارتباط
قال عمر شاهين "أعرف واحد خطب واحدة وكان مقتنع بيها إنها زيه في كل حاجة ونفس اهتماماته وكده.. ومرة كانت معاه في العربية وهو مجنون بمحمد منير فمشغل سي دي في اغانى قديمة لمنير لاقاها مش عرفت الأغانى ومعاجبتهاش.. راح لاغي المشوار اللى كانوا رايحينه وموصلها للبيت وقالها مالناش نصيب في بعض وسابلها الدبلة ولما سألته حصل إيه قالها "ماتحبيش محمد منير بصدق زى ماكنت فاكر.. طلعتى مش نفسى اهتماماتى".
وأضاف عبد الله قائلا "كنت مرتبط بواحدة جارتى في نفس العماره.. المهم ابوها قالها انهم هيجيبوا عربيه فا قالتلي معلش احنا مش هينفع نكمل سوا وكدا قلتلها ماشي اللي انت شيفاه.. شكلها كانت فاكره انهم هيجيبوا دودج المهم عدت الأيام وجابوا العربية وفي الآخر العربية طلعت فيات ١٢١ ، وأنا كنت مكلم ابويا على عربيه جولف فا جبتها بعد ما ابوها جاب العربية بفترة كدا فا اول ما شافت العربيه بتاعتي اتجننت و عاملتلي ادد من جديد روحت مقبلتهاش عملتلي ادد مرره تاني مقبلتهاش برضو روحت كاتب علي قزااز العربيه بتاعتي مش هقبل الادد خلي الفيات تنفعك عشان كل ما تنزل من العمارة تشوف الجملة دي وتفتكر انها باعتنى عشان الفيات".
ويقول مينا حلمى "واحد صاحبی خطيب أخته كان قصير.. والعروسة كانت جايبه جزمة الفرح بكعب عالى.. فقالها غيريها.. قام ابوها قاله خلاص خد انت الجزمة وغيرها .فراح العريس قفش وقالوا يا عمی " يانا يا إما الجزمه راح ابوها قاله يابنی واحنا اخترنا الجزمه مع السلامة".
فسخ خطوبة
وعن موقف سهى حسن تقول " انا تخطبت لواحد دكتور اسنان وانا اصلا دبلوم تجارة ولكن تفكيره ميقولش انه دكتور اصلا اول لما اتخطبنا.. كان بياكل دايما بصوت عالى.. واكتر من كده والله لحد لما زهقت.. وكان لما يجى عندنا يوم الجمعة يفضل مشغل ع الكمبيوتر التشريحات في أي مجال للطب وغصب عنى اتفرج.. ولما كنا بنركب مواصلات كان بيقول لامى ادفعى انتى.. ولو ركبنا تاكسى بينزل هو قبلنا بشوية علشان احنا ننزل الآخر وندفع احنا.. واليوم اللى فسخت الخطوبة فيها كنا في الشقة بنعمل النقاشة قالى انزلى شيلى علب الدهانات من تحت.. العمال استغربو وقاللو عيب مينفعش ونزلو هما جبوهوم...انا بقى فتحت العلب وحطيط الألون على بعض ولغبطتله الدنيا وفسخت الخطوبة بعدها.
ويتابع محمد مسلم سرد المواقف الكوميدية قائلا: "أنا خطبت مرتين وفشكلت و كل مره تكون اسمها أسماء بعد منها بفترة واحد قاللى على واحده كويسه روحت اتقدم لاقيت اسمها أسماء..مخطبتش تانى لحد دلوقتى ."
وتقول ساسو " أنا لسه مفركشة النهاردة لأنى كنت سايقة عربيتى وخطيبى كان سايق عربيته فغصب عنى زنقت على خطيبي بالعربيه وانا سايقه وخليته حك عربيته فجري ورايا بالعربيه ومحصلنيش فزعل.. وقالى بعدها انى متعوده اللف بالعربيه يبقى انا مش محترمه ".
مواقف الطلاق
أما كوكى كمال فتقول "كان في فرح في قاعة جمب بيتنا وكانت العروسة خلاص هتروح بقى مع العريس على بيتهم وبعدين مامة العريس قالتلها تعليق وحش تقريبا قامت العروسة ردت عليها.. قامت مامة العريس ضرباها بالقلم قامت مامة العروسة جاية شاتمة مامة العريس >> بعد كده الفرح كله شتم بعضه وضرب بقى والرجالة تزعق.. وفي قسم ورا البيت برضو قام العريس مطلق العروسة وقالهم والله لاعملكو محضر في القسم واهو ورانا مش بعيد وطلعوا على القسم كلهم ".
وبالنسبة لمحمد عادل يقول " مره واحد صاحبى طلق مراته في ليلة الدخله لما عرف انها كانت مصاحبه صاحبه ومقالتلوش طلقها وقالها ياخاينة مش عايز اعرفك تانى ".
وتقول سارة: "فى واحدة صاحبتى كانت مكتوب كتابها وجوزها طلقها وبعدين بعد كده عرفت من مامته انه طلقها عشان كل ماكان بيجلها كانت بتسيبه وتقعد تتفرج على التليفزيون ".
وتختتم التعليقات أمنية أشرف قائلة: "أنا لما كنت في الجامعة كنت بعمل بحث عن الخلع لقيت واحدة عايزة تخلع جوزها عشان مش عمل عيد ميلاد للقطة بتاعتها ."
%2B-%2BCopy.png)
0 التعليقات:
إرسال تعليق